Retiradong parak, kumare itinumba!
TUGUEGARAO CITY, Cagayan , Philippines — Tadtad ng bala ang isang retiradong pulis at kanyang kumare na negosyante matapos silang ratratin ng mga pinaniniwalaang bayarang berdugo habang magkaangkas sa motorsiklo sa Brgy. Surcoc, Naguilian, Isabela noong Lunes.
Kinilala ng pulisya ang mga biktimang sina Ret. SPO4 Edralino Domingo, 63-anyos na dating nakatalaga sa Burgos Police Station at natalong kandidato para konsehal sa kanyang bayan ng Aurora, at Jane Tul-O, 45, isang mag-aalahas at sinasabing hiniwalayang misis ni Camarines Norte Police Director Colonel Godofredo Tul-o.
Lumalabas sa imbestigasyon na habang inihahatid ni Domingo si Tul-o sa bahay nito sa Brgy.Villaluz sa bayan ng Benito Soliven nang paulanan sila ng bala ng mga sumusunod na killers sakay ng puting pick-up dakong alas-5:00 ng hapon.
Ayon sa mga saksi lumapit pa sa mga natumbang biktima ang mga suspek saka sila tinapos ng dalang M16 armalite rifles at kinuha pa ang cal.45 na baril ni Domingo bago tumakas.
Narekober sa lugar ang 23 basyo ng bala ng cal.5.56.
Inaalam pa ng mga imbestigador ang motibo sa krimen.
- Latest