Binata kinatay, ibinaon ng 3 senglot
LEGAZPI CITY, Albay , Philippines — Patay na at nakalibing ang kalahati ng katawan nang matagpuan ng mga kaanak ang isang 34-anyos na binata matapos pagsasaksakin ng tatlong kainuman sa Sitio Ngob-Ngob, Brgy. Tumalaytay, Mandaon, Masbate kamakalawa ng hapon.
Agad nasawi dahil sa mga saksak sa iba’t ibang bahagi ng katawan ang biktimang si Norbin Bulalacao, mangingisda ng Brgy. Bugtong.
Tinutugis naman ng mga pulis ang tumakas na mga suspek na kinilalang sina Jojo Tupas, Samuel Tupas at Buenvinido Balbuena.
Sa ulat, dakong alas-5:30 ng hapon, nakita ng ilang saksi na nag-iinuman ang biktima at mga suspek. Gayunman, nang malasing biglang pinagtulungang pagsasaksakin ng mga suspek ang biktima na hindi nakapanlaban.
Matapos na mapaslang, hinila pa ng mga suspek si Bulalacao patungo sa tabing dagat at doon tinangkang ilibing pero iniwan at tumakas habang nakalitaw ang kalahati ng katawan ng biktima.
Lumalabas na dati nang may alitan ang mga suspek at biktima.
- Latest
