1 tigok, 2 arestado sa drug ops sa Cavite
MANILA, Philippines — Patay ang isang sinasabing bigtime na ‘tulak’ ng droga habang dalawang kasamahan nito ang arestado at tumataginting na P1.7-milyong halaga naman ng shabu ang nakumpiska sa mga ito sa isang drug operation ng mga otoridad sa Bacoor City, sa Cavite, kahapon.
Ang napatay na suspek ay si Mama Pagetoden Bintangol, nasa hustong gulang, may asawa at residente ng Green Valley, Brgy. Molino 3, ng naturang lungsod.
Swak naman sa kulungan ang dalawang kasamahan ni Bintangol na sina Allan Salik, 29 anyos at si Aladin Salik, 25; kapwa tubong Maguindanao at mga residente rin ng nasabing lugar.
Sa nakalap na ulat, matapos ang ilang araw na surveillance sa ilegal na gawain ng mga suspek ay sunod na isinagawa ang operasyon dakong ala-1:00 ng hapon kung saan naka-iskor ang pulis na tumayong buyer ng nasa P200,000 halaga ng shabu mula sa mga suspek.
Nang magpositibo ito, agad na itong dinakma ng pulisya subalit tumakbo at nanlaban ang isang suspek kung kaya nauwi ito sa engkuwentro.
Makalipas ang ilang minutong palitan ng pu-tok ay tumimbuwang si Bintangol habang naaresto sina Allan at Aladin
Narekober sa mga ito ang may 250 gramo ng shabu na nagkakahalaga ng P1.7-milyon at isang Honda CRV (XJJ 691), isang puting Toyota Innova, at isang kalibre .38 revolver na may mga bala.
- Latest
