2 sundalo, 6 pang Cafgu pinalaya ng NPA
MANILA, Philippines — Pinalaya na ang dalawa pang sundalo at anim na Cafgu (Citizens Armed Forces Geographical Unit) na nalalabi pang bihag ng mga rebeldeng New People’s Army (NPA) sa isang lugar sa Barangay San Juan, Bayugan City, Agusan del Sur nitong Martes ng hapon.
“Yes, all abducted Cafgu and two soldiers are all in,” pagkumpirma ni AFP- Eastern Mindanao Command Commander Major Gen. Felimon Santos Jr.
Ang walo na Prisoners of War (POWs) ng NPA rebels ay pinakawalan matapos ang dalawang buwang pagkakabihag.
Kinilala ang walong pinalayang bihag na sina CAAs (Cafgu Active Auxilary) Jimuel Acebedo; Abel Iligan; Jan-jan Iligan; Rolando Quiao; Gabriel Iligan at James Iligan gayundin sina Cpl. Eric Manangan at PFC. Darlino Carino.
Bandang alas-2:25 ng hapon kamakalawa nang pakawalan ng kanilang mga abductors ang mga bihag sa isang liblib na lugar sa Purok 9, Sitio Hugmakan, Barangay San Juan, Bayugan City, Agusan del Sur.
Magugunita na una nang pinawalan noong Pebrero 14 sa Brgy. San Juan, Bayugan City ang anim na Cafgu at sumunod naman noong Pebrero 18 ang dalawang sundalo sa Brgy. San Antonio, Remedios Trinidad, Agusan del Norte.
Noong Disyembre 19 ng nakalipas na taon ay binihag ng NPA rebels ang dalawang sundalo at 12 Cafgu matapos sumalakay ang 50-80 nitong armadong miyembro sa kanilang patrol base sa Brgy. New Tubigon, Sibagat, Agusan del Sur kung saan nakatangay din sila ng malalakas na armas. (trainee Kim Micah Cabual)
- Latest
