2 bumbero, ex-pulis dedo sa karambola
LOPEZ, Quezon, Philippines — Dalawang bumbero at isang retiradong pulis ang nasawi habang walo pa ang nasugatan makaraang magkarambola ang apat na sasakyan sa Maharlika Highway sakop ng Barangay Pansol sa bayang ito, kamakalawa ng gabi.
Agad na nasawi sa insidente sina SFO2 Cleto Natano, FO3 Ronaldo Alcala, mga miyembro ng Tagkawayan Bureau of Fire Protection at retired SPO4 Juanito Ontiveros.
Sa ulat, sakay ang mga biktima sa isang Mitsubishi Adventure at tinatahak ang highway patungo sa Tagkawayan, Quezon dakong alas-9:30 ng gabi nang banggain sila ng kasalubong na Manila bound P&O Bus Liner na hindi pa nakukuha ang pangalan ng driver. Dahil sa lakas ng pagkakabangga, nawasak ang unahan ng Adventure at matinding nasugatan ang mga biktima na kanilang ikinamatay.
Tinangkang mag-overtake ng bus sa isa pang bus subalit nailang ito sa kasalubong kung kayat kinabig ng tsuper ang manibela pakaliwa at natumbok ang Adventure at bumangga naman sa hulihan nito ang isang Nissan Urvan na naging dahilan upang masugatan ang mga sakay na sina Roderick Ude, Renald Talain, Imee Lerum, Manlix Asurin, Dandy Sunga, Chris Mejilla, Vernon Tanglain at Florendo Dia na ginagamot na sa Magsaysay District Hospital.
- Latest