2 mister itinumba sa Cagayan, Isabela

TUGUEGARAO CITY, Cagayan, Philippines — Dalawang mister ang itinumba ng mga hindi pa natukoy at pinaniniwalaang mga hired killers sa magkahiwalay na insidente sa Cagayan at Isabela kamakalawa.

Sinabi ni PO3 Eduardo Serrano Jr., hindi pa kilala ang isang lalaking niratrat at napatay ng dalawang berdugo habang naglalakad sa Brgy. Centro West sa Ballesteros, Cagayan.

Bumaba mula sa Toyota Hilux ang mga suspek saka pinagbabaril ang biktima dakong alas-4:30 ng hapon. Narekober sa crime scene ang tig-2 basyo ng cal. 45 at 9mm habang nakuha ang plaka ng getaway pickup na NRI 212, dagdag ni Serrano. Sa Ilagan City, Isabela, natagpuan ang bangkay ni George Dangpalan na tadtad ng tama ng bala sa katawan sa bakanteng lote sa Brgy. San Felipe.