Turistang Irish ni-rape sa El Nido
MANILA, Philippines — Nauwi sa bangungot ang masayang bakasyon sa bansa ng isang 21-anyos na turistang Irish national makaraang halayin ng isang tricycle driver sa El Nido, Palawan kamakalawa.
Kinilala ni Supt. Socrates Faltado, spokesman ng Mimaropa Police ang suspek na si Parry Daquer Gaspe, 39, ng Brgy. San Fernando ng lalawigan.
Ayon sa biktima na itinago sa pangalang Clara, insurance sales agent sa Torquay, Ireland at pansamantalang nanunuluyan sa Elternative Hostel, El Nido ng lalawigan, dakong alas-4 ng madaling araw, sakay umano sila ng mga kaibigan sa tricycle ni Gaspe galing sa gimikan at pagsapit nila sa Bacuit gasoline station ay pumara siya para maglakad na lang sa iskinita patungo sa tinutuluyang hotel.
Gayunman, sinabi ng suspek na sasamahan niya muna sandali ang dalaga hanggang sa sundan nito sa paglalakad sa iskinita habang naiwan sa nakatigil na tricycle ang mga kaibigan ng biktima na sina Lea Anna Rosenbosch at isang Oliver dahil sa ibang hotel sila nanunuluyan.
Sinabi pa ng biktima na habang naglalakad, bigla siyang sinunggaban ng suspek na medyo lasing saka hinila at ginahasa sa madilim na bahagi ng iskinita. Nanlaban, nagmakaawa umano ang biktima at sinabing “No, please stop!” pero ‘di pinakinggan ng suspek. Nang makaraos, mabilis na tumakas ang suspek habang agad na nagsuplong ang biktima sa pulisya kasama ang mga kaibigan.
Sa operasyon, nasakote ng Puerto Princesa City Police ang suspek na positibong kinilala ng biktima.
- Latest