2 Nigerian timbog sa drug ops! P.6-M shabu nasamsam
CAVITE , Philippines — Dalawang Nigerian national na hinihinalang bigtime drug traffickers ang nadakma ng puwersa ng Dasmariñas City Police matapos masamsaman ng mahigit P.6-milyong halaga ng shabu sa isinagawang buy-bust operation sa Brgy. Sto Niño 2, ng nasabing lungsod kamakalawa ng gabi.
Kinilala ni P/Supt. Nerwin Ricohernoso, hepe ng pulisya rito, ang mga dinakip na dayuhan na sina John Udeh alias “Duds”, 33-anyos, tubong Imo State, Nigeria at walang permanenteng tirahan dito sa bansa, at Sunday Oguwike, 39, tubong Legos, Nigeria at stay-in sa The Last Salvation of Christ Celestial Church sa Brgy. Anabu 2D, Imus City, Cavite.
Tinutugis naman ng pulisya ang Pinoy na kasamahan ng dalawang Nigerian na si alias “Al Motos”, may-ari ng bahay kung saan isinagawa ang buy-bust operation.
Sa ulat, alas- 9:00 ng gabi nang isagawa ang buy-bust laban sa mga suspek sa Mahogany St., Brgy. Sto. Niño 2, Dasmariñas City, Cavite. Kasama ang puwersa ng Drug Enforcement Unit ng Provincial Intelligence Branch at PDEA-4A, nilusob ng mga operatiba ang bahay ng target na si alias Al Motos. Wala sa lugar ang target pero nadatnan ang dalawang Nigerian na siyang nag-abot umano ng droga sa police poseur buyer. Nasa 100 gramo ng shabu na nagkakahalaga ng P680,000 ang nakumpiska sa dalawang dayuhan.
- Latest