Kandidatong konsehal todas sa ambush
MANILA, Philippines — Patay ang isang kandidato sa pagka-konsehal o Sangguniang Bayan (SB) makaraang tambangan at pagbabarilin ng dalawang armadong salarin sa KM 72, Brgy. Magsaysay Aborlan, Palawan nitong Lunes ng hapon.
Kinilala ni Supt. Socrates Faltado, spokesman ng Mimaropa Police ang nasawing biktima na si Ruben Goh, 51, isang independent SB candidate sa bayan ng Aborlan na idineklarang dead-on-the-spot dahil sa rami ng tinamong mga tama ng bala sa katawan.
Sa ulat, dakong alas-5:09 ng hapon habang lulan ng kanyang motorsiklo ang biktima at bumabagtas sa national highway ng nasabing lugar pauwi sa kanilang tahanan nang bigla na lamang paulanan ng bala ng mga armadong salarin na nakaposisyon sa tabi ng highway. Kagagaling lamang ng biktima sa Sitio Marimras, Brgy. Magsaysay, Aborlan nang siya ay tambangan pagsapit nito sa lugar sanhi upang tumilapon sa minamaneho nitong motorsiklo. Pagbagsak sa espaltadong kalsada, nilapitan pa siya ng mga ‘di kilalang suspek at muling niratrat.
Sinisilip ng pulisya ang mga anggulong pulitika at personal na alitan sa motibo ng pamamaslang.
- Latest
