Sekyu bulagta sa encounter
TALAVERA, Nueva Ecija, Philippines — Bulagta ang isang security guard habang arestado ang tatlo pang kasamahan na walang habas umanong nagpapaputok ng baril matapos na maka-engkwentro ang pulisya sa Brgy. Collado, dito, noong Lunes ng gabi.
Kinilala ni P/Supt. Alexie Desamito, hepe ng Talavera police, ang napatay na suspek na si Ferdinand Viernes, ng nasabing barangay.
Patung-patong na kaso kabilang dito ang droga, pagpapatutok ng baril at estafa ang kinakaharap ng tatlo pang mga naarestong suspek na sina Emmanuel Viernes, Crisanto Dimaya, at Mar Dimaya alyas Bulag.
Batay sa ulat, bandang alas-11:50 ng gabi, rumesponde ang police quick response team at intelligence operatives matapos makatanggap ng ulat hinggil sa walang habas na pagpapaputok ng baril ng mga suspek sa nasabing lugar malapit sa isang palaisdaan. Pagdating sa lugar, agad nasakote ang tatlo, samantalang nagtangka umanong tumakas si Viernes na nauwi sa habulan. Nang makorner, pinaputukan ng suspek ang mga pulis na nauwi sa engkuwentro at ikinasawi nito.
Nakumpiska naman sa tatlong nasukol na suspek ang anim na sachet ng hinihinalang shabu.
- Latest