68-anyos lolo bulagta sa tandem

NUEVA ECIJA , Philippines  —   Patay ang isang 68-anyos na magsasaka makaraang pagbabarilin ng dalawang lalaki na lulan ng isang motorsiklo habang nagdidilig ng mga halaman ang biktima sa Purok 5, Brgy. Pulong Singkamas, General Natividad, ng lalawigan noong Sabado.  Kinilala ang biktima na si Dominador Pesito alyas “Jun Bicol”, tubong Ligao, Albay at nakatira sa nasabing barangay. Patay na nang idating ang biktima sa Premier Medical Center sa Cabanatuan City.

Sa ulat, bandang alas-5:30 ng hapon habang nagdidilig ng halaman ang biktima nang biglang dumating ang dalawang hindi kilalang lalaki sakay ng isang kulay pula na Honda XRM motorcycle. Bumaba sa motor ang isa sa suspek at nilapitan ang biktima habang nasa gate ng kanilang bahay at walang  sabi-sabing binaril sa dibdib.