Grade 11 todas sa gulpi ng kapwa estudyante
MANILA, Philippines — Tuluyan nang binawian ng buhay ang isang grade 11 student matapos na ma-comatose makaraang pagtulungang bugbugin ng kanyang mga kapwa estudyante, sa Mangaldan, Pangasinan, iniulat kahapon.
Ang nasawing biktima ay kinilalang si Kenneth Langit, 17-anyos. Nadakip naman ng mga otoridad ang isa sa mga suspek na si Jay-ar Biagtan sa isang manhunt operation habang sumuko naman ang dalawa pang sina George Maramba, at Jason Soriano, pawang mga grade 12 students sa Mangaldan National High School.
Ayon sa ulat, nasa canteen lamang ng Mangaldan National High School ang biktimang si Langit nang biglang lumitaw ang grade 12 student na si Maramba at walang abug-abog na sinuntok ang biktima.
Nakaganti pa si Langit ngunit tumulong kay Maramba ang kanyang mga kaklase na sina Soriano at Biagtan.
Nawalan ng ulirat si Langit bunsod ng matinding pagkakabugbog ng tatlo na itinakbo sa pagamutan.
Ayon sa pamunuan ng eskwelahan, walang bad record si Langit at posibleng alitan sa babae ang dahilan ng pambubugbog dito.
Nabatid na may gusto kay Langit ang nobya ng isa sa mga nambugbog.
Nahaharap sa kasong frustrated murder ang mga estudyanteng sangkot na may edad 19, 22 at 23.
- Latest
