Pinsan ni misis, kinatay ng lolong mister
MANILA, Philippines — Pinaniniwalaang matinding selos ang dahilan kung kaya napatay ang isang 25-anyos na binata habang sugatan ang 30-anyos nitong pinsang babae nang ataduhin ng taga ng lolong mister ng huli habang magkakasama silang natutulog sa loob ng bahay sa Sitio Ke-iro, Brgy. Cueva sa bayan ng San Pascual, Masbate, kamakalawa ng gabi.
Sanhi ng mga tinamong malalalim na taga sa ibat-ibang bahagi ng katawan, dead-on-the-spot ang biktimang si Ondo Subing-Subing, magsasaka habang sugatan sa dibdib pero nakatakas ang pinsang si Aimy Subing-Subing, balo, at mister ng suspek na si Cesar Rosell, 76-anyos, mangingisda, pawang mga residente ng nasabing barangay.
Sa ulat, dakong alas-10:00 ng gabi, biglang nagising si Aimy nang magsisigaw ang kanyang pinsang si Ondong at nakitang inuundayan ng taga ng kanyang mister.
Sinubukang awatin ni Aimy ang matanda pero pati siya ay binalingan nito at tinaga sa dibdib.
Gayunman, kahit sugatan ay nakatakas ang babae at nakapagsumbong sa mga pulis. Tumakas naman ang suspek lulan ng kanyang de-motor na bangka patungo sa ‘di malamang direksyon sa dagat.
Sa pagresponde ng mga pulis, inabutang naliligo sa sariling dugo at wala nang buhay ang binata.
Sa imbestigasyon, itinanggi ni Aimy na meron silang relasyon ng kanyang pinsan at sadyang sobra umanong napakaseloso ng kanyang matandang mister.
- Latest