22-anyos dalaga inutas sa lamayan

TUGUEGARAO CITY, Cagayan , Philippines  —  Nabulabog ang isang burol ng patay matapos itumba ng pinaniniwalaang hired killer ang isang 22-anyos na dalaga habang nakikipaglaro ng tong-its sa mga nakikilamay sa Brgy. Luna, Roxas, Isabela kahapon ng madaling araw.

Sa report kay Chief Insp. Engelbert Bunagan, hepe ng Roxas Police, kasuwal lang na naglakad ang salarin papunta sa kanyang getaway car habang nagpulasan ang mga nagsusugal sa lamayan matapos na pagbabarilin sa ulo ang biktimang itinago sa pangalang Quirina, tubong Sorsogon dakong ala-1:00 ng madaling araw.

Narekober sa lugar ang tatlong basyo ng bala ng cal. 9mm habang idineklarang patay ang biktima sa isang pribadong ospital. Isa ang umano’y anggulo ng panghuhuthot ng pera ang sinusundang motibo ng mga imbestigador kaugnay sa pagpatay.