Police applicant nilikida ng NPA
MANILA, Philippines — Patay ang isang police applicant makaraang pasukin at pagbabarilin ng pinaghihinalaang mga rebeldeng New People’s Army (NPA) sa loob ng kanyang bahay sa Brgy. Sto. Domingo, Irosin, Sorsogon nitong Martes ng gabi.
Kinilala ang biktima na si Anthony Gestiada, nasa hustong gulang na agad na nasawi sa insidente bunsod ng maraming tama ng bala sa katawan.
Sa ulat ng Police Regional Office (PRO)-V, dakong alas-9 ng gabi habang nasa loob ng kanyang kuwarto ang biktima nang dumating ang mga armadong suspek na lulan ng kulay puting van na walang plaka sa Sitio Balading, ng nasabing barangay. Agad na pumasok sa nakabukas na pintuan ang walang pasintabing mga suspek na tinanong pa ang biktima kung nag-a-apply siya sa pagkapulis. Sinagot naman ito ng maayos ng biktima na sinabing aplikante siya sa pagkapulis at ipinaliwanag na nais niyang makatulong sa pagsupil sa kriminalidad para sa ikasusulong ng peace and order sa kanilang lugar.
“Ganun ba, etong para sayo,” ang sagot naman ng isa sa mga suspek at agad nilang pinagbabaril ang biktima gamit ang mahahabang armas.
- Latest