Indian trader binaril sa ulo

LEGAZPI CITY, Albay  , Philippines  —  Bulagta ang isang 27-anyos na negosyanteng Indian national matapos malapitang barilin ng hinihinalang kapwa Bumbay na kakumpetensiya sa negosyong pautang sa kahabaan ng Buyuan Road, Brgy. Buyuan ng lungsod kahapon ng tanghali. Napuruhan ng punglo sa ulo at katawan si Jasmail Singh, ng Brgy. Tagas, Daraga. Sa ulat, dakong alas-12:45 ng tanghali, nakita ng mga residente na nagtatalo ang biktima at isa pang Bumbay na nakasuot ng bonnet.

Ilang sandali lang ay biglang bumunot ng baril ang kausap na suspek at binaril sa likurang bahagi ng ulo ang biktima. Padapang bumulagta ang biktima at muli pa siyang pinutukan sa likod ng suspek saka agad tumakas lulan ng motorsiklo patungo sa direksyon ng Brgy. Bonga.