Drug surrenderee itinumba

TAYABAS CITY, Philippines — Patay ang isang 25-anyos na dating drug surrenderee makaraang barilin ng dalawang hindi nakikilalang lalaki na pumasok sa bahay nito sa Leveriza Heights Subdivision, Brgy. Isabang, kamakalawa ng tanghali.

Ang biktima na nagtamo ng tama ng bala sa ulo mula sa kalibre .45 baril ay kinilalang si Cer Olliriz Alcala, estudyante, may live-in partner at residente ng nabanggit na lugar. Ayon sa pulisya, bandang alas-11:50 ng tanghali ay mahimbing na natutulog sa ikalawang palapag ng kanyang bahay ang biktima nang pasukin ng mga salarin saka binaril at pagkatapos na isagawa ang krimen ay mabilis na tumakas.

Nabatid na ang biktima ay nahuli noong Nobyembre 22, 2016 sa Woodlane Subdivision sa Sariaya, Quezon dahil sa iligal na droga subalit nakalaya makalipas ang ilang buwan. Patuloy ang imbestigasyon ng mga otoridad sa motibo ng pamamaslang.