GenSan bomber utas sa encounter!
MANILA, Philippines — Napaslang ang isang umano’y miyembro ng Islamic State of Iraq and Syria (ISIS) inspired group na Ansar al-Khilafa Philippines (AKP) na kabilang sa pangunahing suspek sa pambobomba sa General Santos City matapos makasagupa ang tropa ng pamahalaan sa Brgy. Tambler ng lungsod kahapon ng umaga.
Kinilala ang sinasabing terorista na napatay na si Bassir Sahak, ng Brgy. Daliao, Maasim, Sarangani habang nakatakas ang ama nito na si Kupang Sahak.
Sa ulat ni Police Regional Office (PRO) 12 Director P/Chief Supt. Eliseo Tam Rasco, dakong alas-5:45 ng umaga nang makasagupa ng pinagsanib na elemento ng pulisya at militar ang mga miyembro ng AKP terrorists na nakabase sa Sarangani sa Brgy. Tambler ng lungsod.
Sinabi ni Rasco na papalapit pa lamang sa lugar ang arresting team nang salubungin sila ng mga putok mula sa AKP–ISIS inspired terrorists na nagresulta sa mainitang bakbakan. Narekober sa encounter site ang isang M16 rifle, bandolier na may magazine at mga bala, back packs, cellphones at sari-saring mga sangkap sa paggawa ng bomba.
Si Basser umano ang isa sa mga teroristang kinasuhan ng multiple frustrated murder sa pambobomba sa Bonita Lying Inn sa Purok Malipayon, Brgy. Apopong, General Santos City na ikinasugat ng walong indibiduwal noong Sept. 16.
- Latest
