Lider ng drug group, huli sa buy-bust
MANILA, Philippines — Arestado ang itinuturong lider ng notoryosong “Harold Certeza Drug Group” sa isang buy-bust operation ng pulisya sa Binangonan, Rizal kamakalawa ng gabi.
Sa ulat ni Rizal Provincial Director P/Senior Supt. Lou Frias Evangelista kay Calabarzon Regional Director P/Chief Supt. Edward Carranza, kinilala ang suspek na si Harold Certeza alyas “Poging Baligtad”, 44, at residente ng 127 Sitio Mayon Street, Barangay Libis, Binangonan.
Si Certeza ay ang lider ng “Harold Certeza Drug Group,” na nag-o-operate sa lalawigan ng Rizal, at itinuturing na No.2 sa listahan ng Street List Target (SLT) Drug Personality ng Binangonan.
Lumitaw na mayroong warrant of arrest sa hukuman ang suspek dahil sa kasong paglabag sa Republic Act 9165 o Comprehensive Dangerous Drugs Act of 2002.
Batay sa ulat ng Binangonan Municipal Police Station, dakong alas-6:00 ng gabi nang isagawa ang buy-bust operation laban sa suspek sa naturang lugar. Nagpanggap na poseur buyer si SPO2 Walter Mercado at kasama ang isang confidential agent ay bumili ng isang pakete ng shabu sa suspek sa halagang P1,000. Nang magkaabutan ng kontrabando at buy-bust money, agad na nagpakilalang pulis si Mercado at inaresto ang suspek.
Nakumpiska mula kay Certeza ang isang pouch na may lamang walong pakete ng shabu, P6,900 cash at P1,000 buy-bust money.
- Latest
