Bigtime pusher timbog sa P11-M shabu
MANILA, Philippines — Swak sa kulungan ang isang itinuturong bigtime na drug pusher matapos na masakote ng mga otoridad at makumpiskahan ng P11-milyong halaga ng shabu sa isinagawang buy-bust operation sa Tagbilaran City, Bohol nitong Miyerkules ng gabi.
Arestado sa operasyon ang pusher na si Joseph Alburadora, 43-anyos, residente ng Mansasa District sa lungsod ng Tagbilaran.
Ang operasyon na ikinasa dakong alas-8:30 ng gabi ay alinsunod sa inisyung search warrants ng korte laban sa nasabing suspek na itinuro ng mga nasakoteng drug pusher na siyang supplier nila ng shabu.
Nakumpiska mula rito ang 36 malalaking plastic na naglalaman ng shabu at karagdagan pang pitong medium packs ng nasabing uri ng droga at tinatayang nasa P11,033,000.00 ang kabuuang halaga.
Kasalukuyan na ngayong humihimas ng rehas na bakal ang nasakoteng suspek na nahaharap sa kasong kriminal.
- Latest
