Single mom bulagta sa love triangle
KIDAPAWAN CITY , Philippines — Love triangle ang isa sa mga sinisilip na motibo sa pagbaril at pagpatay sa isang single mother sa bisinidad ng Sinsuat Street, Brgy. Poblacion, Kidapawan City, North Cotabato, Martes ng gabi.
Kinilala ng Kidapawan City Police ang biktima na isang Aiko Jean Aporado Losis, 23-anyos at nakatira sa 3rd block, Lopez Street, Brgy. Poblacion, Kidapawan City.
Ayon sa report, alas-8:40 ng gabi nang maganap ang insidente habang naglalakad ang biktima kasama ang dalawang kaibigan matapos na makipag-inuman at magyayaang lumipat sa Porticus Bar. Nang makarating sila sa harap ng gasoline station sa nasabing lugar, bigla na lang umanong dumating ang mga suspek na sakay ng motorsiklo at pinagbabaril si Losis.
Patay noon din ang biktima matapos na tamaan ng bala sa noo habang tumakas ang mga salarin patungong Sinsuat Extension ng Barangay Poblacion.
Nauna rito, may nakasagutan umano ang biktima na dati nitong ka-relasyon na siyang sinisilip na motibo sa krimen.
- Latest