NPA ambush: Parak todas, 1 grabe
MANILA, Philippines — Isang pulis ang nasawi habang isa pa ang malubhang nasugatan makaraang tambangan ng mga rebeldeng New People’s Army (NPA) sa liblib na bahagi ng Brgy. Villa, Maria Aurora, Aurora nitong Martes ng hapon.
Kinilala ang nasawi na si Police Officer 2 Ronald Martial Ruidera, kasapi ng Aurora Provincial Force Mobile Company habang isinugod sa pagamutan ang sugatang si SPO2 Angelo Gawat, nakataga sa Maria Aurora Municipal Police Station (MPS).
Sa ulat ni Police Regional Office (PRO) 3 Director P/Chief Supt. Amador Corpus, bandang alas-2:30 ng hapon nang mangyari ang pananambang sa nabanggit na lugar.
Ayon sa imbestigasyon kasalukuyang bumabagtas sa lugar ang mga elemento ng pulisya at Army’s 91st Infantry Battalion (IB) upang magresponde sa napaulat na panununog ng grupo ng NPA rebels pero pagsapit sa bisinidad ng Brgy Villa ng bayang ito ay bigla na lamang pinaulanan ng bala ng mga nakaposisyong kalaban.
Sa kabila ng nasa mataas na bahagi ang mga rebeldeng terorista ay nakipagpalitan ng putok ang mga awtoridad pero sinawimpalad na masawi si PO2 Ruidera.
“We assure the surviving family of the financial support and benefits due to him as well as for SPO2 Gawat who is now under medical attention,” ayon kay Corpus.
Kasabay ng pakikiramay sa naulilang pamilya ng pulis, kinondena ng opisyal ang NPA dahil sa patuloy na paghahasik ng terorismo na pinupuntirya ang mga PNP personnel na tumutupad lamang sa kanilang tungkulin. (with trainee Hermie Rivera)
- Latest