Trader, helper kinatay ng stude na kawatan
MANILA, Philippines — Malagim ang sinapit na kamatayan ng isang negosyante na nagmamay-ari ng isang tindahan at helper nito habang isa pa ang sugatan matapos silang pagsasaksakin ng isang estudyante na nanloob sa kanila sa Brgy. San Antonio, Molo District, Iloilo City kamakalawa.
Tadtad ng saksak sa katawan ang store owner na si Teresita Tagriza, 74-anyos at helper nitong si Remedios Malaga, 52, na agarang kumitil sa kanilang buhay matapos na undayan ng sunud-sunod na saksak ng suspek na si Rene Diocos, 22, electrical technology student ng Iloilo Science and Technology University sa Alimodian, Iloilo.
Sa ulat ni Chief Inspector Marlon Valencia, hepe ng Molo District Police Precinct, nangyari ang krimen sa tindahan ni Tagriza sa nasabing lugar bandang alas-8:30 ng umaga. Bigla na lamang pinasok ni Diocos ang store at agad nitong pinagsasaksak ang negosyante at isinunod ang helper na noon ay naglalaba. Bagaman nakalaban ang helper, mas nagapi siya ng suspek. Nadamay naman ang anak nitong si Julie Ann, 35, na nasaksak sa balikat nang madaanan ng suspek habang papatakas dala ang mga kinulimbat na pera at iba pa sa tindahan.
Naaresto ng mga nagrespondeng pulis ang suspek na may tama ng saksak sa kamay matapos na manlaban ang helper at ngayo’y nilalapatan ng lunas sa West Visayas State University Medical Center.
Nahaharap sa kasong double murder at frustrated murder ang suspek.
- Latest
