Magsasaka patay sa landslide

MANILA, Philippines — Nasawi ang isang mag­sasaka matapos na mailibing nang buhay nang matabunan ng lupa nang gumuho ang isang bahagi ng bundok malapit sa kanyang sakahan sa Brgy. Sipaco sa bayan ng Lagonoy, Camarines Sur noong Huwebes ng hapon.

Wala nang buhay nang mahukay at matagpuan ng mga kaanak at residente ang biktimang si Darwin Bermejo, nasa hustong gulang, at residente ng nasabing barangay.

Sa ulat, dakong ala-1:00 ng hapon, dahil sa ilang araw na pagbuhos ng ulan ay lumambot ang lupa at biglang gumuho ang itaas na bahagi ng bundok at tumabon sa biktima.

Agad sumaklolo ang mga residente at opisyal ng barangay at nagtulung-tulong sa paghukay sa biktima.

Gayunman, dahil sa dami ng lupa na tumabon kay Bermejo patay na ito nang mahukay.