2 Indonesian kinidnap ng Sayyaf
MANILA, Philippines — Dalawang Indonesian ang umano’y kinidnap ng mga hinihinalang teroristang Abu Sayyaf Group (ASG) sa Malaysia na tumahak patungo sa direksyon ng karagatan ng Pilipinas sa Sulu kamakalawa.
Ayon kay AFP Spokesman Lt. Col. Gerry Besana, spokesman ng AF –Western Mindanao Command (AFP-Westmincom), kasalukuyan pa nilang beneberipika ang ulat na kidnapping sa dalawang Indonesian.
Sa ulat, ang dalawang Indonesian na inaalam pa ang pagkakakilanlan ay kasalukuyang sakay ng isang fishing vessel sa Sabah, Malaysia nang harangin at dukutin ng mga armadong kalalakihan sakay ng isang pump boat.
Ayon kay Besana, ang dalawang dayuhan ay tinangay ng mga armadong kidnappers sa Sulu pero sketchy pa ang impormasyon ukol dito. Naghihintay pa umano sila ng update mula sa Task Force INDOMALPHI (Indonesia, Malaysia, Philippines) sa Tawi-Tawi at Naval Forces Western Mindanao (NAVFORWest) sa napaulat na kidnapping.
Inalerto na ang AFP Joint Task Force Sulu para sa posibleng pagpasok ng mga kidnappers sa lalawigan tangay ang panibagong mga bihag. (trainee Hermie Rivera)
- Latest
