2 militia men, buntis utas sa ambush!
NORTH COTABATO , Philippines — Dalawang Civilian Active Auxiliary o CAA at isang ginang na buntis ang nasawi sa naganap na pananambang ng ‘di pa kilalang mga suspek sa Brgy. Ginatilan, Pikit, North Cotabato kahapon ng hapon.
Kinilala ang mga nasawing CAA na sina Richard Wacan at isang alias Maro, kapwa nasa hustong gulang.
Ayon kay P/Sr. Insp. Arvin John Cambang, deputy chief of police dito na may isang buntis na nakilalang si Hasna Buka ang nadamay at nasawi sa ambush.
Ang mga biktima ay pawang nagtamo ng maraming tama ng bala sa iba’t ibat bahagi ng kanilang katawan.
Sa ulat ni P/Supt. Bernard Tayong, tagapagsalita ng Cotabato Police Provincial Office, sakay ang mga biktima sa motorsiklo at binabagtas ang daan buhat sa Poblacion ng Pikit at pagdating sa tapat ng Dalandag National High School ay tinambangan sila ng mga suspek at pinagbabaril ng matataas na kalibre ng baril.
Sinunog pa umano ng mga suspek ang motorsiklo ng mga biktima.
- Latest
