Bahay ng ex-governor nasunog

BAYOMBONG, Nueva Vizcaya  , Philippines  —  Sa kabila ng kasagsagan ng ma­lakas na pagbuhos ng ulan, natupok ang dalawang gusali kabilang ang tahanan ng dating gobernador sa lalawigang ito kamakalawa ng gabi.

Sa ulat ng Bureau of Fire Protection, isang two-storey residential house at isa pang 2-storey na paupahan na pag-aari ni dating Governor at Congressman Atty. Rodolfo Agbayani ang naabo matapos lamunin ng apoy sa Brgy. Don Mariano Marcos ng ba­yan na ito.

Sinabi ni Municipal Fire Marshall Erwin Dacumos, lumalabas na nagsimula ang apoy sa isa sa mga kuwarto sa ikalawang palapag ng residential house dakong alas-9:30 ng gabi na mabilis kumalat hanggang sa madamay ang isa pang gusali na pagmamay-ari rin ni Agbayani.

Sinabi ni Agbayani na nagkataon na wala silang mag-asawa sa kanilang bahay nang maganap ang sunog matapos silang magtungo sa kanilang farmhouse sa Barangay Magapuy sa bayan para dalawin ang kanilang anak na duma­ting para magbakasyon. Aniya, lahat ng kanyang mga memorabilia bilang abogado at mga alaala bilang isang politiko ay tinupok ng apoy kabilang na ang mga mamaha­ling personal collections nilang mag-asawa.

Nagpasalamat na lamang si Agbayani at walang nasaktan o napahamak sa  4-oras na pagsiklab ng apoy.