Carwash attendant itinumba

MANILA, Philippines — Pinabulagta ng ‘di pa nakilalang gunman ang isang 37-anyos na carwash attendant habang naglilinis ng isang malaking truck sa gilid ng National Highway sa Purok Talisay, Brgy. Malasila, Makilala, North Cotabato, gabi ng linggo. Kinilala ang biktima na si Rowel Genita Amigo alias Kikay, ng Purok Kawayan, Sitio Balawan, sa nabanggit na barangay. Dakong alas-9:45 ng gabi kung saan nakausap pa umano ng biktima ang suspek nang biglang umikot sa malaking sasakyan sakay ng Bajaj na motorsiklo at pinagbabaril ang biktima.

Naisugod pa sa ospital si Amigo pero idineklarang patay dakong alas-10:35 ng gabi dahil sa tama ng bala sa dibdib at tiyan. Ang biktima ay dati na umanong sumuko sa batas dahil sa diumano’y pagkakasangkot sa illegal na droga.