Police station inatake ng NPA: 2 pulis sugatan
MANILA, Philippines — Dalawang pulis ang sugatan matapos na salakayin ng nasa 50 hanggang 80 mga rebeldeng New People’s Army ang kanilang himpilan habang ilang armas naman ang natangay naganap sa Lapinig, Northern Samar kahapon ng madaling araw.
Kinilala ang mga nasugatang pulis na sina PO2 Jerry Quilicol at PO1 Edison Aguirre.
Sa ulat, dakong alas-2:00 ng madaling araw nang salakayin ng mga rebeldeng komunista ang Lapinig Municipal Police Station (MPS) na lulan ng Elf truck at dump truck na may escort pang dalawang motorsiklo at pawang armado ng malalakas na kalibre ng armas tulad ng UZI, K3 submachine guns, M16, M14 at M 203 grenade launchers.
Nasugatan ang dalawang pulis na nagdepensa sa nasabing himpilan. Anim lamang ang mga pulis sa nasabing himpilan nang mangyari ang insidente.
Nagawang matangay ng mga umatakeng rebelde na pinamumunuan ng isang alyas ‘Ka Marmar’ ang sampung M-16 rifles, dalawang Glock pistol, isang Beretta pistol, personal na laptop at isang USB na pag-aari ng hepe ng Lapinig Police na si Inspector Noli Montibon.
- Latest