HVT bulagta sa shootout

LUCENA CITY, Philippines — Isang hinihinalang high value target (HVT) ang napaslang sa iligal na droga makaraang makipagbarilan sa mga operatiba ng Lucena PNP Drug Enforcement Unit habang isinasagawa ang anti drug operation sa purok Anak Bagong Sinag, Brgy. Cotta, ng lungsod kahapon.

Kinilala ni Supt. Romulo Albacea, chief of police dito ang napaslang na suspek na si Reynaldo Falcon, 52, may asawa ng Purok Masikap ng nasabing barangay. Ikinasa ng mga operatiba sa pamumuno ni Chief Insp. Mark Amat ang buy-bust laban sa suspek dakong alas-3 ng hapon subalit nakahalata umano ang huli na pulis ang kanyang katransaksyon kung kaya tumakbo at nagpaputok ng kalibre 38.

Doon na gumanti ang mga awtoridad at napaslang ang suspek na nakuhaan ng nasa 17 gramo ng shabu.