BJMP vehicle inambus: 3 preso patay!
MANILA, Philippines — Tatlong inmates ang nasawi makaraang tambangan at paulanan ng bala ng hindi pa nakilalang mga armadong kalalakihan ang sinasakyan nilang service vehicle ng Bureau of Jail Management and Penology (BJMP) habang patungo sa korte sa Talisay City, Cebu noong Biyernes ng umaga.
Kinilala ni Supt. Marlu Conag, Acting Chief of Police ng Talisay City ang mga nasawing preso na sina Yayam Gaviola, 40; Marvin Abelgas, 27 at Jovencio Rabadon, 36 anyos; pawang binawian ng buhay sa Talisay City District Hospital matapos silang isugod dito ng kanilang mga jail escorts.
Nakaligtas naman sa pananambang ang dalawang BJMP personnel na ’di tinukoy ang mga pangalan at eskort ng tatlong preso.
Bandang alas-9:21 ng umaga habang patungong Talisay City Hall ang service vehicle lulan ang mga preso nang pagsapit sa highway ng Brgy. Linao ay dinikitan ng isang motorsiklo lulan ang armadong mga lalaki.
Ayon kay Conag, sina Gaviola at Abelgas ay pawang nahaharap sa kaso ng illegal na droga habang frustrated murder naman kay Rabadon.
Si Gaviola ay isang high value target (HVT) sa drug watchlist na umano’y may koneksyon sa drug lord na si Steve Go. Siya ay nakulong matapos na mahulihan ng 110 gramo ng shabu habang si Abelgas ay isang HVT na nago-operate naman sa Cebu City at si Rabado ay konektado sa umano’y drug lord na si Frans Sabalones.
Sinabi ni Abrugena na ang naturang mga inmates ay maraming beses nang nahulihan ng cellphone sa kanilang selda sa Oplan Greyhound operations ng mga awtoridad at pinaniniwalaang kahit na nakakulong ay tuloy pa rin ang operasyon ng illegal na droga.
- Latest