Mag-utol minasaker ng bayaw
NORTH COTABATO , Philippines — Patay ang magkapatid na magsasaka matapos na pagbabarilin ng kanilang mismong bayaw na kanilang ginulpi dahil sa dating alitan sa Sitio Quarry, Barangay Malapag, Carmen, North Cotabato, Linggo ng gabi.
Sa ulat ni PO2 Barry Crist Sanchez ng Carmen Police, kinilala ang mga biktima na sina Jerry Mijares Caw-it, 44-anyos at ang nakakatandang kapatid nito na si Alex, 49-anyos, kapwa residente ng nasabing lugar.
Batay sa ulat, nangyari ang krimen dakong alas-7:00 ng gabi kung saan pinasok sila ng kanilang bayaw na si Joel Eseguerra Talandron, 35-anyos at pinagbabaril.
Nauna rito, sinuntok umano ng magkapatid ang kanilang bayaw kaya sa sobrang galit ng huli ay pinasok nito ang bahay ng kanyang mga bayaw at niratrat gamit ang kalibre .45 na pistola.
Nagtamo ang mga biktima ng maraming tama ng bala sa iba’t-ibang bahagi ng kanilang katawan na naging dahilan ng agaran nilang kamatayan.
Nadakip na ng mga awtoridad ang suspek matapos ang ginawang krimen.
- Latest