Rider nalasog sa SUV

LEGAZPI CITY, Albay  , Philippines  —  Nalasog ang katawan ng isang 40-anyos na rider matapos bumangga ang sinasakyang motorsiklo sa kasalubong na SUV sa kahabaan ng national highway ng Brgy. Bogtong, ng lungsod noong Sabado ng gabi. Sinubukan pang isugod ng Albay EMS Rescue Team sa Bicol Regional Training and Teaching Hospital pero idineklarang patay ang biktimang si Alexander Balonso, ng Purok 3, Brgy. Sta. Misericordia, Sto. Domingo.

Sa ulat, dakong alas-6:10 ng gabi, mabilis na binabagtas ng rider ang highway nang mawalan ng kontrol ang minamanehong motorsiklo nito sa palikong bahagi at inukopa ang linya ng kasalubong na SUV Montero (MER-06) na minamaneho ni Dennis Dino, 48, ng Brgy, Malabog, Daraga. Matapos bumangga sa SUV, humataw pa ang katawan ng rider at kanyang motorsiklo sa gutter ng kalsada dahilan para agad na masawi. Sumuko naman sa rumespondeng mga pulis ang driver ng SUV.