Tserman uli, itinumba ng tandem
MANILA, Philippines — Isa na namang barangay chairman ang nasawi matapos na pagbabarilin ng riding-in-tandem habang dumadalo ang opisyal sa isang Farmer’s Day activity sa bayan ng Surallah, South Cotabato, Huwebes ng umaga.
Kinilala ang biktima na si Pudi Ambalgan, nasa hustong gulang, punong barangay ng Upper Sepaka ng nasabing bayan.
Batay sa ulat, nangyari ang insidente dakong alas-8:30 ng umaga kung saan katatapos lamang ng parada sa isinagawang Farmer’s Festival sa naturang bayan. Nakasandal sa sasakyan ang tserman sa harap ng munisipyo nang barilin ng mga suspek.
Nagtamo ng tama ng bala sa kanyang dibdib si Ambalgan mula sa hindi pa malamang uri ng kalibre ng baril.
Agad na isinugod sa pinakamalapit na ospital ang biktima habang tumakas ang mga suspek sakay ng isang motorsiklo.
Sa hiwalay na panayam kay Surallah chief of police, Chief Inspector Jardi Mont Sibal, wala pa aniyang inilalabas na medical bulletin ng naturang opisyal habang nagpapatuloy ang hot pursuit operation laban sa mga suspek.
Naniniwala naman si Surallah Mayor Antonio Bendita na walang kaugnayan sa politika ang motibo ng pamamaril at pagpatay kay outgoing barangay chairman Pudi Ambalgan ng Upper Sepaka dahil natalo umano ang biktima noong nakaraang Barangay at SK election.
- Latest