NPA officer tiklo sa Bohol
MANILA, Philippines — Bumagsak sa pinagsanib na elemento ng militar at pulisya ang isang mataas na opisyal ng mga rebeldeng New People’s Army sa isinagawang operasyon sa Tagbilaran City, Bohol, ayon sa opisyal kahapon.
Kinilala ni Brig. Gen. Dinoh Dolina, Commander ng 3rd Infantry Division ng Philippine Army, ang nasakoteng lider ng NPA na si Pedro Lumantas, gumagamit ng mga alyas na Dadoy, Andoy at Didoy, Deputy Secretary ng NPA Bohol Party Committee, Southern Bohol Regional Committee.
Ayon sa opisyal, si Lumantas ay nasakote sa followup operations ng pinagsanib na puwersa ng Bohol Provincial Police Office at 47th Infantry Battalion ng PA habang nagpapagamot sa tinamo nitong sugat sa Ramiro Hospital sa Tagbilaran City na tinamo nito may limang araw na ang nakakalipas.
Nabatid na may nakapag-tip sa tropa ng militar at pulisya na naka-confine sa Ramiro Hospital sa Tagbilaran City kaya agad silang nagsagawa ng operasyon na nagresulta sa pagkakabitag dito kamakailan.
Nabatid naman kay Lt. Elma Grace Remonde, Civil Military Operations Officer ng 47th IB na si Lumantas ay sangkot sa serye ng paghahasik ng terorismo sa Cebu at Bohol kabilang na ang ambush–slay sa dalawang CAFGU noong Abril at Mayo ng taong ito.
Napagalaman pa na si Lumantas ay may warrant of arrest na inisyu ng Regional Trial Court (RTC) Branch 47 sa Tagbilaran City.
- Latest
