Ex-pdea, 4 tulak utas sa shootout
MANILA, Philippines — Limang pinaghihinalaang notoryus na drug pushers kabilang ang isang dating ahente ng Philippine Drug Enforcement Agency (PDEA) ang napaslang matapos kumasa sa mga operatiba ng pulisya sa naganap na magkakahiwalay na shootout sa lungsod ng San Pablo at Calamba;Laguna nitong Miyerkules.
Sinabi ng bagong talagang si Police Regional Office (PRO) IV A Director P/Chief Supt. Guillermo Eleazar na isa sa tatlong mga napatay na suspek ay si Reynaldo Dante, dating PDEA agent sa lalawigan ng Laguna na nag-AWOL (Absence Without Official Leave) matapos na masangkot sa illegal na aktibidades.
Ang PRO-IV A ay sumasaklaw sa lalawigan ng Cavite, Laguna, Batangas, Rizal at Quezon (CALABARZON ).
Bandang alas-5 ng umaga nang magsagawa ng buy bust operation ang mga operatiba ng pulisya sa Brgy. Sto. Angel, San Pablo City pero pumalag ang mga target na sina Dante, usher na si Wilbert Sardido at isang hindi pa nakilalang tulak na nauwi sa shootout ng magkabilang panig.
Sa kasagsagan ng palitan ng putok ay napaslang sina Dante,Sardido at isa pa nilang kasamahang drug pusher habang narekober naman sa encounter site ang tatlong cal. 45 pistol, pitong sachet ng shabu at P2,000 na hinihinalang pinagbentahan ng mga ito sa droga.
Inihayag naman ni Sr. Supt. John Kirby Kraft, Acting Provincial Director ng Laguna Police, sa isa pang insidente ay nauwi sa palitan ng putok ang buy bust operation sa Brgy. Pansol, Calamba City dakong alas-2:30 ng madaling araw na kung saan ay napatay ang suspek na sina Christopher Gonce, alyas Boy at isang hindi pa nakilalang drug pusher.
Narekober sa lugar ang isang 38 caliber revolver at isang M203 grenade launcher, 13 sachets ng shabu, 11 cartridge ng naturang mga armas at mga bala.
- Latest