P2.56-B droga nilusaw sa Cavite
Pinangunahan nila PDEA Dir. Gen. Aaron Aquino at Det. Supt. Richard Standford ng Australian Federal Police ang pagwasak sa P2.56-bilyong halaga ng iligal na droga na nakumpiska sa serye ng operasyon sa iba’t-ibang bahagi ng bansa sa isinagawang ‘destruction ceremony’ kahapon sa Trece Martirez City, Cavite. Kuha ni Michael Varcas
MANILA, Philippines — Nasa P2.56-bilyong halaga ng iligal na droga na nakumpiska sa serye ng operasyon sa iba’t-ibang bahagi ng bansa ang winasak ng Philippine Drug Enforcement Agency (PDEA) sa isinagawang ‘ceremonial destruction’ sa lalawigan ng Cavite nitong Biyernes.
Sa pangunguna ni PDEA Director General Aaron Aquino, winasak sa nasabing ‘destruction ceremony’ ang P2,560, 028,001.60 na kabuuang halaga ng illegal drugs sa Integrated Waste Management Inc sa Brgy. Aguado, Trece Martirez City, Cavite.
Una nang ipinag-utos ng korte sa PDEA ang pagwasak sa mga nakumpiskang iligal na droga matapos na maiprisinta sa korte bilang ebidensya laban sa mga drug lords at iba pang drug personality na nililitis sa kaso.
Ang mga nilusaw na droga ay binubuo ng sari-saring mga ebidensya na kinabibilangan ng metamphetamine hydrochloride o shabu, marijuana, ephedrine, cocaine, toluene, chloromethamphetamine hydrochloride, at mga expired na gamot na winasak sa pamamagitan ng thermal decomposition.
Nabatid na ito ang ikaapat na beses na nagsagawa ng paglusaw sa mga ebidensyang droga simula nang manungkulan sa puwesto si Aquino may anim na buwan na ang nakalilipas kung saan ay aabot na sa P9.4 bilyong halaga ng iligal na droga ang winasak ng PDEA.
- Latest
