Titser nakatakas sa Abu kidnappers
MANILA, Philippines — Nagawang makatakas ng isang babaeng guro mula sa mga bandidong Abu Sayyaf Group (ASG) na dumukot sa kanya sa kagubatan ng Patikul, Sulu nitong Martes ng umaga.
Kinilala ni Sr. Inspector Jemar delos Santos, Spokesman ng Autonomous Region in Muslim Mindanao (ARMM) Police ang nakatakas na bihag na si Sitti Doris Hamsirani, 45, biyuda, ng Sitio Palar, Gandasuli, Patikul, Sulu.
Ang biktima ay tinutukan ng baril at binihag ng mga armadong bandido sa bisinidad ng Sitio Bakud Datan, Brgy. Timbangan sa Patikul nitong Marso 7 patungo sa kagubatan ng Sulu.
Sinabi ni delos Santos na naispatan ng mga residente ang bihag habang hinihingal sa matinding pagod na naglalakad sa kagubatan ng Sitio Putih, Brgy. Liang ng bayang ito dakong alas-9:30 ng umaga kamakalawa.
Agad namang nagresponde ang mga operatiba ng pulisya sa ilalim ng superbisyon ni Sr. Supt. Pablo Labra III, Provincial Director ng Sulu Police at ligtas na narekober ang bihag.
Ayon naman kay Chief Supt. Graciano Mijares, regional director ng ARMM Police, nagawang makatakas ng bihag dahil sa pinaigting na opensiba ng tropa ng militar at mga elemento ng pulisya laban sa mga kidnappers.
- Latest