63-anyos lola pumalag sa rape, pinagtataga
LEGASPI CITY, Albay, Philippines — Isang 63-anyos na lola at mister nito ang malubhang nasugatan matapos silang pagtatagain ng isang suspek makaraang pumalag sa tangkang panggagahasa sa loob ng kanilang bahay sa Brgy. Calao sa bayan ng Prieto Diaz, Sorsogon kamakalawa ng gabi.
Kinilala ang biktima na si Gloria Neo Ollet at asawang si Santiago Ollet, kapwa residente ng nasabing barangay habang nakatakas naman ang suspek na si Alexander Demonteverde Sicad Jr.
Sa ulat na nakarating sa Camp Gen. Simeon Ola, dakong alas-11:45 ng gabi, habang nasa kasarapan ng tulog ang lola sa loob ng kanilang kuwarto nang maramdaman nito na hinuhubaran siya ng damit ng suspek at nakita pa ang suspek na nakahubad.
Gayunman, nagtangkang manlaban ang lola at nagtangkang sumigaw sa tangkang panggagahasa ni Sicad kaya pinagtataga siya sa ibat-ibang bahagi ng kanyang katawan.
Dumating naman ang asawang ng ginang na si Santiago pero pati siya ay tinaga sa ulo ng suspek at saka mabilis na tumakas.
Kapwa nagpapagaling ang mag-asawa sa Sorsogon Provincial Hospital habang patuloy na pinaghahanap at inihahanda ang kaso laban sa suspek.
- Latest
