Tinedyer natalo sa volleyball, pumatay

MANILA, Philippines - Dahil sa pagkatalo sa larong volleyball, napatay ang 32-anyos na lalaki matapos itong saksakin ng 17-anyos na binatilyo sa Barangay Situbo, bayan ng Roxas, Zamboanga del Norte kamakalawa ng hapon. Napuruhan sa tiyan ang biktimang si Ricky Suya habang pinaghahanap naman ng pulisya ang suspek na itinago sa pangalang Pedro na mabilis na tumakas matapos ang krimen. Base sa police report na nakarating sa Camp Crame, naitala ang krimen sa nabanggit na lugar bandang alas-4 ng hapon. Ayon sa ulat, naglaro ng volleyball ang grupo ng suspek at ng biktima na nauwi sa kantiyawan matapos na matalo ang binatilyo saka mga barkada nito. Sa tindi ng inabot na pangaalaska ay nagalit ang suspek kaya dinaluhong ng saksak ang biktima na duguang bumulagta.