Tandem dedo sa suwag ng truck

MANILA, Philippines – Kapwa idineklarang dead-on-arrival sa ospital ang dalawang katao na sakay ng isang motorsiklo nang sila ay suwagin ng dump truck sa national highway ng Brgy. Cauri­ngan, Sison, Pangasinan kahapon ng madaling araw.

Ang mga nasawi ay kinilalang sina Jerry Salinas, 35, driver ng motorsiklo at angkas nitong si Aira Rizza Navarro,16, sanhi ng matitinding sugat na tinamo sa kanilang mga katawan.

Kasalukuyan namang nilalapatan ng lunas sa pagamutan ang driver ng Isuzu dump truck (RFM-243) na si Joemarie Agtarat, 20.

Sa ulat ni Sr. Supt. Rolie Saltat, Officer-in-Charge ng Pangasinan Police, naitala ang insidente sa kahabaan ng nasabing highway bandang alas-12:37 ng mada­ling araw.

Kasalukuyang buma­bagtas ang kulay itim na motorsiklong Blaze na walang plaka na minamaneho ni Salinas kaangkas si Navarro nang suwagin sila ng dump truck na minamaneho ni Agtarat.

Ang mga nasawi ay pa­tungo sa katimugang direksyon habang sa north bound naman ang Isuzu dump truck  nang mangyari ang sakuna.

Sa pagsusuri ng mga doktor ang driver ay nasa impluwensya ng alak nang mangyari ang insidente. Nahaharap sa kasong reckless imprudence resulting to double homicide at damage to property ang driver ng dump truck.