Pintor grinipuhan ng sekyu, dedo

BULACAN, Philippines - Napaaga ang salubong ni kamatayan sa 36-anyos na pintor matapos itong sasakin ng senglot na sekyu sa naganap na kaguluhan sa Barangay Muzon, San Jose Del Monte City, Bulacan kamakalawa ng gabi. Hindi na umabot ng buhay sa ospital dahil sa napuruhan sa tiyan ang biktimang si Ariston Acuña habang nasakote naman ang suspek na si Diego Grama, 39, ng San Jose Heights sa nasabing barangay. Sugatan naman sina Antonio Ferrer, Rolly Damaso at Richard Roxas na kasalukuyang nasa ospital. Ayon kay PO2 Marlon Matus, magkasamang nag-iinuman ng alak sina Damaso at Grama nang komprontahin nina Acuña at Ferrer kaugnay sa matagal ng alitan sa pagitan ng anak ni Ferrer at ng suspek. Dito na sumiklab ang kaguluhan hanggang sa mapatay ang biktima.