Orcollo, Chua ‘di maawat

MANILA, Philippines — Tuloy lang ang impresibong ratsada nina Dennis Orcollo at Johann Chua nang humirit ng tiket sa Last 16 ng 2021 US Open 9-Ball Pool Championship na ginaganap sa Harrah’s Resort sa Atlantic City.

Mainit pa rin ang palad ni Orcollo matapos kub-rahin ang 11-6 panalo laban kay Oliver Szolnoki ng Hungary sa kanilang fifth-round match.

Hataw din si Chua na namayani naman kay Mieszko Fortunski ng Poland sa pamamagitan ng 11-7 desisyon sa hiwalay na fifth-round game.

Inaabangan pa sina Orcollo at Chua kung sino ang makakalaban nila sa Last 16 mula sa mga makakalusot mula sa losers’ bracket.

Ipatutupad na ang knockout stage sa Last 16 ng torneong may nakaalaan na $50,000 para sa magkakampeon at $25,000 naman sa runner-up.

Buhay pa rin ang pag-asa nina dating World 9-Ball champion Carlo Biado at Rodrigo Geronimo sa lo-sers’ bracket.

Nanalo si Biado sa kababayang sina Jeffrey de Luna (11-6) at Alex Pagulayan (11-0) gayundin kina Ralf Souquet ng Germany (11-3) at David Raya ng Amerika (11-3) habang wagi naman si Geronimo kay Niels Feijen ng Netherlands (11-6).

Tuluyan nang namaalam sa kontensiyon sina Warren Kiamco, Jeffrey Ignacio, James Aranas, Roland Gracia, Roberto Gomez at Daniel Dagotdot matapos umani ng ikalawang kabiguan.