Bagong season ng Idol Philippines, trending sa social media
Mainit na tinanggap ng manonood lalo na ng netizens ang bagong season ng Idol Philippines nitong Sabado (Hunyo 24) at Linggo (Hunyo 25) kung saan napanood ang pagsungkit ng 17 anyos na Batangueña na si Kimberly Baculo ng kauna-unahang platinum ticket.
Napabilib nga ng dalaga ang judges na sina Regine Velasquez, Moira dela Torre, Chito Miranda, at Gary Valenciano sa kanyang interpretasyon ng bersyon ni KZ Tandingan na Isang Linggong Pag-ibig.
Ipinakilala sa bagong season ang platinum ticket, kung saan ang mga nabigyan nito ay lulusot na sa unang dalawang round ng kompetisyon at dederecho na sa Solo Round. Tig-isang platinum ticket lang ang pwedeng maibigay nina Regine, Moira, Chito, at Gary sa audition rounds.
Sa unang linggo ng auditions, pinalad sina Misha de Leon, Dave Maramag, Ann Raniel, Jarae Ifurung, at PJ Fabia na makuha ang golden ticket para umusad sa susunod na round ng kompetisyon.
- Latest
