Niabot nang China sa Guiuan
Segun sa Google, 880 ka kilometro ang gilay-on sa kadagatan sa Guiuan, Eastern Samar gikan sa Scarborough Shoal, nga maoy tradisyonal nga pangisdaan sa mga Pilipinhon, apil na sa mga mangingisda gikan sa Olango sa Opon, sa West Philippine Sea pero gibabagan na karon sa Chinese Coast Guard vessels.
Nganong nakaabot man sa kadagatan sa Guiuan, Eastern Samar ang Chinese fishing vessel nga FV KAI DA 899 nga hapit malunod pero naluwas sa BRP Cabra sa Philippine Coast Guard (PCG) ug nadalang mga tripulante ug barko ngadto sa pantalan sa Tacloban City?
* * *
May sukaranan ang pagduda sa PCG sa tinuod nga rason sa presensiya sa pito ka Chinese nationals ug sa ilang barko sa Kabisay-an: Way kahimanan sa pangisda nga nakit-an sud sa barko, wa motug-an asang bahina sa China sila gikan ug unsay registry number sa barko.
Nagpasalamat nang Chinese Embassy sa pagkaluwas sa Chinese nationals, nga ilang giisip nga timaan sa suod nga panaghigalaay sa duha ka nasud, pero wa magtagad pagtubag sa lehitimong mga pangutana sa PCG, nga gidasonan sa Bureau of Customs (BOC) ug Bureau of Immigration (BI).
* * *
Gigamit ba lang sa China ang fishing vessel nga pantalya sa tinuod nilang tuyo? Mas importante ba kay sa pangisda ang tuyo sa pito ka tripulante? Dugay na ba ning gihimo sa China ug karon pa masakpi tungod sa kakusog sa huros sa hangin ug kadagko sa bawod nga naka-apiki sa barko?
Niabot na ba ang China og pagpangespiya sa Eastern Visayas? Wa na bay gi-santo ang China nga bisan asang bahin sa atong nasudnong teritoryo?
* * *
Hinaut nga makahipos og mapuslanong kasayuran ang mga imbestigasyon sa PCG, BOC ug BI. Hinaut nga makakuha og klarong katin-awan gikan sa Chinese Embassy ang Department of Foreign Affairs (DFA).
Pero kon basehan ang nahitabo sa pakisusi sa nangaging susama nga mga insidente, apil nang presensiya sa barko sa gubat sa China sa Sulu Sea sa Mindanao sud sa tulo ka adlaw atol sa administrasyon ni kanhi Presidente Rodrigo Duterte, mahimong isnabon ra gihapon sa Beijing ang atong mga pakisusi ug mohilom ra gihapon ang Malakanyang sa makapa-alarma na nga mga pagpangyatak sa atong nasudnong sobereniya.
* * *
- Latest
