Crime of passion sa Camarines Sur: Dyowa binigti, suspek ginilitan ang sariling leeg
CALABANGA, Camarines Sur, Philippines — Kapwa duguan at patay na nang matagpuan sa loob ng kanilang kuwarto ang magdyowa matapos na pinaniniwalaang binigti ng lalaki ang kinakasama nito saka niya ginilitan ang sarili sa Zone-2, Brgy. San Roque ng bayang ito kamakalawa ng umaga.
Kinilala ang mga biktima na sina Noel Esperon Palomares Jr., 35-anyos at Shiela Tolentino Seña, 44-anyos, kapwa nakatira sa nasabing lugar.
Sa ulat, dakong alas-10 ng umaga ay humingi ng responde sa Calabanga Police ang tatay ni Palomares hinggil sa naririnig na pagtatalo at matinding komosyon ng mag-partner sa loob ng kanilang tinutuluyang bahay.
Gayunman, pagdating ng mga pulis ay nagulantang sila at ng mga kaanak matapos nilang mabuksan ang nakakandadong pinto ng kuwarto ng dalawa. Dito na tumambad ang mag-partner na duguang nakahiga sa ibabaw ng kama habang nakayakap pa ang lalaki sa babae.
Sa inisyal na imbestigasyon ng mga kasapi ng PNP-SOCO, nakitaan ng marka sa leeg si Seña na posibleng binigti ng kinakasamang si Palomares gamit ang electrical cord habang may malalim na laslas sa leeg ang nasabing lalaki.
Matapos mapatay ang kinakasama, dito na nag-lock ng kuwarto ang lalaki saka nito nilaslas ang sariling leeg.
Narekober naman ng mga pulis ang duguang kutsilyo na pinaniniwalaang ginamit ng nasabing lalaki sa paglaslas sa sarili.
Selos ang isa sa tinitingnang anggulo sa matinding pagtatalo ng mga biktima na hindi pa idinetalye ng pulisya at mga kaanak, na nauwi sa malagim na krimen at pagpapatiwakal.
- Latest