Motor vs bike: Rider utas, 1 pa sugatan
CAVITE, Philippines — Patay ang isang motorcycle rider habang kritikal ang isa pang lalaking nagbibisikleta matapos silang magsalpukan at masagasaan pa ng paparating na van habang kapwa bumabagtas sa kahabaan ng Aguinaldo Highway, Brgy Lalaan 2nd sa bayan ng Silang, dito sa lalawigan, kahapon.
Dead-on-arrival ang biktima na nakilalang si Jose Villanueva, 24 anyos, factory worker, residente ng Plaza Homes Anabu, Brgy Anabu 2-A, Imus,Cavite.
Kasalukuyan naman inoobserbahan sa pagamutan ang biker na nakilalang si Jaime Austria, 49-anyos, mananahi at residente ng Purok 155, Brgy. San Jose, Tagaytay City.
Hawak naman ng pulisya ang driver ng Hi Ace van na nakasagasa kay Villanueva na si Abubacar Pangulamen Camar, 32 anyos ng Pitugo, Bauan, Batangas.
Sa imbestigasyon ni P/Cpl. Ralph Jayson Santos, may hawak ng kaso, alas-6:55 ng umaga habang minamaneho ni Villanueva ang kaniyang Suzuki Raider 150 (9110 GL) na may kabilisan ang patakbo nang hindi umano nito agad napansin ang papatawid na si Austria habang nagbibisikleta upang sumalpok dito at kapwa sumemplang.
Sa kamalasan, tumilapon ang biktima at nasagasaan ng paparating na Toyota Hi-Ace van (DAZ 8682) ni Camar na hindi na nakaiwas.
Agad na itinakbo sa pagamutan ang dalawa subalit idineklarang dead-on-arrival si Villanueva habang kasalukuyang inoobserbahan ang biker na si Austria.
- Latest