SUV rumagasa sa Lipa: 1 dedo, 1 sugatan
BATANGAS, Philippines — Patay ang 29-anyos na construction worker habang isa pa ang sugatan matapos mabundol ng isang rumaragasang SUV sa lungsod ng Lipa, Linggo ng madaling araw.
Kinilala ng pulisya ang nasawi na si Limuel Quiambao, habang sugatan ang kasamahang construction worker na si Jay Em Yumol, 17, kapwa residente ng Arayat, Pampanga.
Sa inisyal na imbestigasyon, alas-3:30 ng madaling araw ay naglalakad lamang ang mga biktima sa shoulder ng JP Laurel highway nang bigla na lamang silang mahagip ng humaharurot na Mitsubishi Montero sport na minamaneho ni Patrick Kyle Castillo, 24-anyos.
Naisugod pa sa Lipa City District Hospital ang mga biktima pero idineklara nang dead on arrival ng doktor si Quiambao. Nagtamo naman ng mga sugat sa katawan si Yumol at kasalukuyang nagpapagaling sa naturang ospital.
Naaresto rin ng pulisya ang driver na si Castillo, na taga-Barangay Bagong Pook, Lipa City.
Ayon sa pulisya, una nang umamin si Castillo na nakainom ng alak nang mangyari ang insidente.
- Latest
