Barangay kagawad pinabulagta sa basketball tournament

MILAGROS, Masbate, Philippines — Bulagta sa barangay plaza ang isang incumbent barangay kagawad matapos na pagbabarilin ng dalawang hindi nakilalang gunmen habang nanonood ng basketball tournament sa Brgy. Capaculan ng bayang ito kamakalawa ng gabi.

Napuruhan ng isang tama ng punglo sa ulo at agad nasawi ang biktimang si Edison Aganan Rosero, 55, may asawa at residente ng naturang lugar.

Sa ulat, dakong alas-8:30 ng gabi habang masayang nanonood ng basketball sa kanilang plaza ang biktima nang biglang sumulpot mula sa kanyang likuran ang dalawang lalaki na armado ng hindi malamang kalibre ng baril.

Bago pa nakakilos ang biktima ay walang kaabug-abog na siyang binaril sa ulo at katawan sanhi upang bumulagta sa lugar.

Mabilis na nakatakas ang gunmen na sumabay sa pagkakagulo at pagtatakbuhan ng mga tao na natakot sa pamamaril. Patuloy sa ginagawang ang mga pulis para malaman ang pagkakakilanlan ng mga suspek at motibo sa pamamaslang.