Dengue cases sa Bulacan tumaas, fogging pinaigting

MALOLOS CITY, Bulacan, Philippines — Dahil sa patuloy na pagtaas ng kaso ng dengue lalo sa panahon ng tag-ulan, ipinag-utos ni Gob. Daniel Fernando ang agaran at pinaigting na mga hakbang sa pag-iwas laban sa dengue sa lalawigan.

 Sa isang online meeting na tinawag na “Collaborative Efforts for the Dengue and Prevention Control” na pinangunahan ng Provincial Health Office-Public Health (PHO-PH) kahapon, sinabi ni Fernando na dapat regular na isinasagawa ang fogging o spraying sa mga apektadong lugar.

Plano ni Fernando na gumawa ng executive order na nag-aatas sa mga may-ari ng gusaling pang­negosyo na magsagawa ng fogging o spraying kahit isang beses sa isang buwan bilang preventive measure upang matigil ang pagkalat ng dengue na mula sa kagat ng lamok.

Hinikayat naman ni Cielito Nikki Ross Gonzales, dengue program coordinator ng PHO-PH na sundin ang enhance 4S strategies: suyurin at sirain ang pinamumugaran ng mga lamok; sarili ay protektahan laban sa mga lamok; sumangguni agad sa pagamutan kapag may sintomas ng dengue; suportahan ang fogging/spraying operations kapag may banta ng outbreak.

Ipinag-utos na rin ng gobernador sa PHO-PH na magsagawa ng oryentasyon para sa mga opis­yal ng barangay, health workers at mga volunteer upang paigtingin ang pagbabantay at implementasyon ng enhance 4S strategies sa bawat barangay.

Ayon sa PHO-PH, nakapagtala ang Bulacan ng may kabuuang 2,737 kaso ng dengue mula Enero hanggang Hunyo 11, 2022 na mas mataas ng 54% kumpara sa parehong panahon noong nakaraang taon kung saan karamihan sa naitalang kaso (40%) ay mula sa age bracket na 11-20 taong gulang.